Астананың техникалық және кәсіптік білім беру ұйымдарының екі педагогі республикалық кәсіби шеберлік байқауларында бірінші орын иеленді, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Семей қаласында IT саласы педагогтері арасында «Желілер және жүйелік әкімшілендіру» құзыреттілігі бойынша республикалық кәсіби шеберлік байқауы өтті. Онда Астана қаласы әкімдігінің «ASTANA POLYTECHNIC» жоғары колледжінің педагогі Светлана Лапенко қатысып, бірінші орынды жеңіп алды.
Байқау барысында ол ақпараттық технологиялар, компьютерлік желілер және жүйелік әкімшілендіру салаларындағы кәсіби біліктілігін көрсетті.
Ал 14-16 қазан аралығында Павлодар қаласындағы Жоғары электроника және коммуникация колледжінде «Теміржол станциясындағы қозғалысты ұйымдастыру» құзыреттілігі бойынша республикалық кәсіби шеберлік байқауы ұйымдастырылды.
Аталған сайыста Астана қаласы әкімдігінің Жоғары көлік және коммуникация колледжінің арнайы пәндер оқытушысы Гүлжайна Сырымбетова алтын медаль иегері атанды. Байқау барысында оған сарапшы-компатриот Лариса Матвеева қолдау көрсетті.
Екі педагогтің жетістігі елорданың техникалық және кәсіптік білім беру ұйымдарындағы мамандардың кәсіби даярлық деңгейін көрсетеді.
Астана қаласының Білім басқармасы жеңімпаздарды құттықтап, алдағы жұмыстарына табыс тіледі.