Елордада қоғамдық тәртіпті сақтау және азаматтардың тыныштығын қамтамасыз ету бағытындағы жұмыстар жалғасып жатыр, деп хабарлайды kazlenta.kz тілшісі Polisia.kz сайтына сілтеме жасап.
Жыл басынан бері Астанада тыныштықты бұзуға байланысты 50 мыңға жуық құқық бұзушылық фактісі тіркелді. Мәселен, түнгі сағат 03:30 шамасында Торайғыров көшесінде тыныштықтың бұзылғаны туралы “102” арнасына хабарлама келіп түсті. Оқиға орнына полиция қызметкерлері барып, мән-жайды анықтады.
Тексеру барысында тыныштықты бұзу фактісі анықталып, 20 жастағы азаматқа қатысты заң аясында шара қабылданды. Полиция азаматтарға түнгі уақытта тыныштықты сақтап, айналасындағылардың демалу құқығын құрметтеу қажеттігін ескертеді. Әсіресе тұрғын үйлердің маңында қатты музыка қою, айқайлау және өзге де шу шығаратын әрекеттер көршілердің мазасын алып, заң талаптарын бұзуға әкеп соғуы мүмкін. Қоғамдық тәртіпті сақтау – әр азаматтың ортақ жауапкершілігі. Егер тыныштық бұзылып, құқық бұзушылық болса, азаматтар полицияның “102” арнасына хабарласа алады.