Түркістан облысында берешегі бар жүргізушілер жауапқа тартылды, деп хабарлайды kazlenta.kz тілшісі Polisia.kz сайтына сілтеме жасап.
Түркістан облысында жол қозғалысы қауіпсіздігін қамтамасыз ету және құқық бұзушылықтардың алдын алу бағытындағы жұмыстар тұрақты түрде жүргізілуде. Ордабасы ауданында полиция қызметкерлері “Қорғау” ақпараттық жүйесі арқылы жол қозғалысы ережелерін бұзған және бұрын салынған әкімшілік айыппұлдарын белгіленген мерзімде өтемеген жүргізушілерді анықтады.
Тексеру барысында екі Toyota автокөлігінің жүргізушілері бірнеше рет жол ережесін бұзғаны анықталды. Бірінші жүргізуші белгіленген жылдамдықты асырған, қауіпсіздік белдігін тақпаған, көлік басқару кезінде ұялы телефон пайдаланған және жол белгілерінің талаптарын сақтамаған. Екінші жүргізушінің де жол қозғалысы ережелерін бірнеше рет бұзғаны анықталды. Ол қауіпсіздік белдігін тақпаған, жол белгілеріне бағынбаған, жылдамдықты бірнеше рет асырған, көлік қоюға тыйым салынған жерге автокөлігін қойған және көлік басқару кезінде ұялы телефон пайдаланған. Заңнама талаптарына сәйкес аталған көлік құралдары мамандандырылған айыптұраққа қойылды.