Таразда 91 рет құқық бұзушылық жасаған жүргізуші анықталды, – деп хабарлайды kazlenta.kz тілшісі Polisia.kz сайтына сілтеме жасап.
Жамбыл даңғылында полицейлер бірнеше ай ішінде жол қозғалысы ережелерін 91 рет бұзған Chevrolet Cobalt автокөлігінің жүргізушісін тоқтатты. Ер адам жылдамдықты бірнеше рет асырған және жол қозғалысы ережелерінің талаптарын елемеген. Жүргізуші "Қорғау" интеллектуалды жүйесі арқылы анықталды. Бұл жүйе жол қозғалысын автоматты түрде бақылаудың тиімділігін арттырады. Мұндай цифрландыру және заманауи технологиялар жол қауіпсіздігін қамтамасыз етудің маңызды құралына айналуда. Көлік арнайы айыптұраққа қойылды. Полиция жол қозғалысы ережелерін сақтау — әрбір жүргізушінің міндеті екенін еске салады. Жолдағы қауіпсіздік — жауапкершіліктен басталады!