Абай облысында жыл басынан бері қауіпсіздік белдігін тақпаған 26 358 азамат анықталды, – деп хабарлайды kazlenta.kz тілшісі Polisia.kz сайтына сілтеме жасап.
Абай облысының полиция департаменті жыл басынан бері жол қозғалысы қауіпсіздігін арттыруға бағытталған кешенді іс-шараларды жүзеге асырып келеді. Жүргізілген бақылау нәтижелері қоғамның назарын жолдағы қауіпсіздік мәдениетіне аудару қажеттігін көрсетеді. Жыл басынан облыс аумағында қауіпсіздік белдігін тақпаған жүргізушілер мен жолаушылардың саны 26 358 фактіге жетті. Сонымен қатар жол қозғалысының басқа қатысушыларына, әсіресе жаяу жүргіншілерге басымдық бермеудің 468 фактісі тіркелді.
Құқық бұзушылықтардың шамамен жартысы дрондардың көмегімен анықталып отыр. Бұл әдіс жолдағы тәртіпті сақтау мен қадағалауды тиімді жүргізуге мүмкіндік береді. Полиция тұрғындарға жол қозғалысы ережелерін қатаң сақтау, сақтық пен жауапкершілік таныту ұсынады.