Тачэн қаласында (Қытай) Қытай мен Орталық Азия елдері арасындағы сауда-экономикалық байланысты және шекара маңындағы ынтымақтастықты дамытуға арналған «Бакту – 2026» форумы өтті, деп хабарлайды kazlenta.kz тілшісі ҚР Көлік министрлігіне сілтеме жасап.
Іс-шараға Қазақстан Республикасы Көлік министрлігінің, Абай облысы әкімдігінің, «Қазақстан темір жолы» ҰК» АҚ, «Кедентранссервис» АҚ және бизнес өкілдері қатысты.
Форум аясында Қазақстан Республикасы Көлік министрлігі Теміржол және су көлігі комитеті төрағасының орынбасары Елдос Нестай көлік-логистикалық инфрақұрылымды және халықаралық көлік дәліздерін одан әрі дамытудың маңыздылығын атап өтті.
Оның айтуынша, Қазақстан «Шығыс – Батыс» және «Солтүстік – Оңтүстік» көлік дәліздерін, Транскаспий халықаралық көлік бағытын дәйекті түрде дамытып, шекаралық және порттық инфрақұрылымды жетілдіруде.
«Бұл бағытта Қытаймен ынтымақтастыққа ерекше орын беріледі. 2026 жылдың бірінші жартыжылдығының қорытындысы бойынша Қазақстан мен Қытай арасындағы теміржол көлігімен жүк тасымалдау көлемі 18,7 млн тоннаға жетіп, 9%-ға өсті. Осы кезеңде Қазақстаннан экспорттық тасымалдар 10%-дан астамға артты. Бұл нәтижелер елдеріміз арасындағы көлік байланысының нығая түскенін айқын көрсетеді», – деп атап өтті Елдос Нестай.
Көлік саласындағы өзара ынтымақтастықты одан әрі кеңейтудің негізгі бағыттарының бірі – ұзындығы 303 шақырымды құрайтын «Бақты – Аягөз» теміржол желісін салу жөніндегі ауқымды жобаны іске асыру.
Жаңа теміржол желісінің құрылысы белсенді қарқынмен жүргізілуде. Бүгінде жер төсемін төсеу, жасанды құрылыстар мен көпірлер салу жұмыстары жалғасып, рельс-шпал торын төсеу басталды. Нысанда шамамен 1,4 мың маман және 900-ге жуық техника жұмылдырылған.
Жобаны іске асыру Қазақстан мен Қытай арасындағы үшінші теміржол шекара өткелін ашуға, көлік дәлізінің өткізу қабілетін жылына 25 млн тонна жүкке дейін арттыруға және еліміздің транзиттік әлеуетін дамыту үшін қосымша мүмкіндіктер жасауға мүмкіндік береді.
Айта кетейік, форум биыл бесінші рет өткізіліп отыр. Шара жоғары деңгейде қол жеткізілген уағдаластықтарды іске асыруға, сауда-экономикалық өзара іс-қимылды дамытуға, сондай-ақ іскерлік байланыстар мен ынтымақтастық мүмкіндіктерін кеңейтуге арналған тиімді алаңға айналды.