Шығыс Қазақстан облысы Ұлан аудандық полиция бөлімінің қызметкерлері қару мен оқ-дәрілерді заңсыз сақтау фактісін анықтады, деп хабарлайды kazlenta.kz тілшісі Polisia.kz сайтына сілтеме жасап.
Ауылдық жерде тұратын 52 жастағы тұрғынның үйін тексеру кезінде полицейлер қару-жарақ пен оқ-дәрілерді тәркіледі. Олардың қатарында тегіс ұңғылы аңшылық мылтықтан жасалған бір ұңғылы кесінді, сигналдық револьвер және 50-ге жуық патрон бар. Ер адам қару мен оқ-дәрілердің қайтыс болған ағасынан қалғанын айтқан. Аталған факті бойынша қылмыстық іс қозғалды.
Полиция қару мен оқ-дәрілерді заңсыз сатып алу, сақтау және алып жүру қылмыстық жауапкершілікке әкеп соғатынын ескертеді. Қару немесе оқ-дәрілер табылған жағдайда оларға қол тигізуге немесе өз бетінше орнын ауыстыруға болмайды. Мұндай жағдайда дереу полицияға хабарлау қажет. Қауіпсіздік заң талаптарын сақтаудан басталады. Кез келген қару заңнамада белгіленген тәртіппен ғана сақталуы және пайдаланылуы тиіс.