ШҚО-да патрульдік полицейлер қиын жағдайға тап болған отбасыға жедел көмек көрсетті, — деп хабарлайды kazlenta.kz тілшісі Polisia.kz сайтына сілтеме жасап.
Өскемен – Алтай – Рахман қайнарлары тасжолының 63-шақырымында патрульдік полиция экипажына жергілікті тұрғын көмек сұрап жүгінген. Оның кәмелетке толмаған қызының денсаулығы күрт нашарлап, іші қатты ауырған. Қызға шұғыл медициналық көмек қажет болған. ПА-414 экипажы құрамында қызмет атқарған полицейлер Серік Қыдырбеков пен Ахметуали Ақанов әйелдің өтінішіне бірден ден қойып, қажетті шешім қабылдаған. Полицейлер әйелдің көлігін Өскемен қаласына дейін жедел түрде алып жүруді ұйымдастырған.
Патрульдік полиция қызметкерлерінің жедел әрі үйлесімді әрекетінің арқасында қыз бала Өскемен қаласындағы Ана мен бала орталығына уақытылы жеткізіліп, оған қажетті медициналық көмек көрсетілді. Полицейлердің көмегі отбасының жолда уақыт жоғалтпай, медициналық мекемеге тезірек жетуіне мүмкіндік берді. Қыздың анасы полиция қызметкерлеріне көрсеткен көмегі, жеделдігі мен қиын сәттегі қолдауы үшін шынайы алғысын білдірді.