Өскемен қаласында облыстық патрульдік полиция батальонының қызметкерлері қайғылы жағдайдың алдын алды, – деп хабарлайды kazlenta.kz тілшісі Polisia.kz сайтына сілтеме жасап.
Қызметтік ауысым аяқталғаннан кейін патрульдеу бағытынан әкімшілік полиция басқармасына қарай келе жатқан ПА-447 экипажының қызметкерлері – Олжас Жансолтанов пен Адай Құрметов понтон көпірінде қоршау маңында тұрған ер адамды байқаған. Полицейлер бірден тоқтап, азаматқа қарай бет алған. Осы сәтте оқиға орнының маңында болған тұрғындар да көмек көрсетуге жұмылған. Полицейлер мен қала тұрғындарының батыл әрі үйлесімді әрекеттерінің арқасында ер адам қауіпсіз жерге шығарылды.
Құтқарылған азамат Өскемен қаласының 38 жастағы тұрғыны болып шықты. Кейін оған қажетті көмек көрсету үшін медицина қызметкерлеріне тапсырылды. Аталған оқиға полиция қызметкерлерінің жедел әрекеті мен азаматтардың белсенді азаматтық ұстанымы адам өмірін сақтап қалуда және қоғамдық қауіпсіздікті қамтамасыз етуде маңызды рөл атқаратынын тағы бір мәрте көрсетті.