Жарқайың ауданында Шойындыкөл ауылының 65 жылдығы мен Шойындыкөл негізгі мектебінің 40 жылдығына арналған салтанатты іс-шаралар өтті.
Мерекелік бағдарлама Шойындыкөл негізгі мектебінде басталды. Қонақтар ауыл мен мектептің тарихына арналған көрмемен танысып, архивтік материалдар мен фотосуреттерді тамашалады. Сондай-ақ мерейтойға орай дайындалған бейнеролик көрсетілді.
«Шойындыкөл – тарихы терең, еңбекқор тұрғындары мен берік дәстүрлері бар ауыл. Алдағы уақытта да көркейіп, дамып, әрбір тұрғыны туған жерін мақтан тұта берсін. Баршаңызға зор денсаулық, толағай табыс пен жаңа жетістіктер тілеймін», – деді аудан әкімі Ербол Жүсіпбеков.
Мерейтой аясындағы ерекше оқиғалардың бірі – мектептің алғашқы түлектерінің бірі, қазақстандық суретші, дизайнер және реставратор Алтыншаш Алпысбаеваның жеке көрмесі болды.
«Туған ауылымның мерейтойына қатысу – мен үшін үлкен мәртебе. Өз шығармашылығымды жерлестеріме ұсына алғаныма қуаныштымын. Шойындыкөлдің гүлденуіне, ал тұрғындарына бақыт, бейбітшілік пен бақ-береке тілеймін», – деді Алтыншаш Алпысбаева.
Мерейтой құрметіне аудан әкімі ауылдың материалдық-техникалық базасын нығайтуға арналған 7 миллион теңгенің сертификатын табыстады. Сонымен қатар мектепке тоңазытқыш, моноблок және принтер сыйға берілді. Ауылдың дамуына елеулі үлес қосқан тұрғындар Алғыс хаттармен және бағалы сыйлықтармен марапатталды.
Мектептің әр жылдардағы түлектері де құттықтау сөз сөйлеп, мектептегі қызықты естеліктерімен бөлісті. Ауыл тұрғындары мен қонақтары үшін киіз үйлер тігіліп, ақ дастарқан жайылды. Мерейтойлық іс-шара концерттік бағдарламамен және мерекелік отшашумен қорытындыланды.