Сайрам ықшам ауданына қарасты Ақбұлақ елді-мекенінде мәдениет үйінің ашылу салтанатына аудан әкімі Арман Сәбитов қатысып, тұрғындардың қуанышына ортақтасты.
"Бүгін еліміздің ерекше аталып өтілетін мерекесі қарсаңында, халық игілігіне беріліп отырған мәдениет үйі осындағы тұрғындар үшін расында үлкен қуаныш.Көп жылдар бойы шешімін күткен мәселе, мемлекеттік қолдаудың арқасында жедел шешімін тапты. Көптеген қуанышты сәттердің куәсі болатын өнер иелерінің ошағы ізгіліктер мен жақсылықтарға тола берсін" ,-деп атап өтті аудан басшысы Арман Сәбитов.
Ақбұлақтағы мәденеиет үйіне қатысты мәселе бірнеше жылдан бері көтеріліп келген. Былтырғы жылы аудан басшылары бұл тірлікті қолға алып, «Ауыл-Ел бесігі» бағдарламасына ұсыныпты. Жоба аясында қаржысы қаралып, құрылыс жұмыстары уақтысында жүргізілген.Заманауи талаптарға сай бой көтерген екі қабатты ғимаратта ауыл өнерпаздарынан бөлек, балаларға да барлық жағдай жасалған. Олар үшін мұнда 10-ға жуық үйірме жұмыс істейді деп жоспарланып отыр. Сондай-ақ, мәдениет үйінде 11 мыңға жуық қоры бар кітапхана да оқырмандарға қызмет етпек.
Бүгінде аудан бойынша жалпы 31 мәдениет мекемесі халыққа қызмет көрсетуде. Оның ішінде мәдениет үйлерінің саны 10. Ақбұлақ ауылындағы бұл ғимарат 11-ші клуб болып іске қосылып отыр. 6 мыңға жуық тұрғыны бар ауылда, алдағы уақытта спорт кешенін салу жоспарланып отыр екен. Биылғы жылдың тағы бір қуанышты жаңалығымен бөлісе кетейік, ауылда заман талабына сай білім ошағы салынған.