Талдықорған қаласының полиция қызметкерлері алкогольдік ішімдіктерді шамадан тыс тұтынатын және профилактикалық есепте тұрған азаматтармен күнделікті негізде алдын алу жұмыстарын жүргізуде, деп хабарлайды kazlenta.kz тілшісі Polisia.kz сайтына сілтеме жасап.
Учаскелік полиция инспекторлары есепте тұрған азаматтардың тұрғылықты мекенжайларына барып, профилактикалық әңгімелесулер өткізеді, заң талаптарын түсіндіріп, құқық бұзушылықтарға жол бермеу қажеттігін ескертеді. Жыл басынан бері алкогольдік ішімдіктерді шамадан тыс тұтынатын 2 200-ге жуық азамат профилактикалық есепте тұр. Әсіресе алкогольдік масаң күйде жасалатын құқық бұзушылықтардың, отбасылық-тұрмыстық жанжалдардың алдын алуға және азаматтардың қауіпсіздігін қамтамасыз етуге ерекше назар аударылуда. Мұндай жұмыстар жүйелі түрде жүргізіліп, құқық бұзушылықтарға ықпал ететін қауіп-қатерлерді дер кезінде анықтауға, қайталанатын құқық бұзушылықтардың алдын алуға және қоғамдық тәртіпті сақтауға бағытталған.
Полиция алкогольдік ішімдіктерді шамадан тыс тұтыну көбіне тұрмыстық жанжалдар мен құқыққа қайшы әрекеттерге себеп болатынын еске салады. Құқық бұзушылықтардың алдын алу және азаматтардың қауіпсіздігін қамтамасыз ету “Заң мен тәртіп” қағидаты аясындағы полиция қызметінің басым бағыттарының бірі болып қала береді.