Елордада тазалықты сақтау, абаттандыру мәдениетін қалыптастыру және экологиялық құқық бұзушылықтардың алдын алуға бағытталған республикалық "Таза Қазақстан" экологиялық акциясы жалғасып жатыр, - деп хабарлайды kazlenta.kz тілшісі Polisia.kz сайтына сілтеме жасап.
Жыл басынан бері полиция қызметкерлері қоқысты заңсыз тастау, қоғамдық орындарды ластау, абаттандыру қағидаларын бұзу және қаланың санитарлық жағдайына кері әсер ететін өзге де құқық бұзушылықтар үшін шамамен 20 мың азаматты әкімшілік жауапкершілікке тартты. Кезекті рейдтік іс-шаралар барысында құрылыс алаңына іргелес аумақты талапқа сай күтіп ұстамау фактісі анықталды.
Қоқыс пен құрылыс материалдарын белгіленбеген орындарға жинағаны үшін құрылыс ұйымының басшылығы Қазақстан Республикасының Әкімшілік құқық бұзушылық туралы кодексінің 505-бабының 1-бөлігіне сәйкес әкімшілік жауапкершілікке тартылды. Астана қаласының полиция департаменті тазалық пен абаттандыру қағидаларын сақтау әрбір тұрғын мен ұйымның ортақ міндеті екенін еске салады. Қаладағы тәртіп пен тазалық — қоршаған ортаға деген жауапкершіліктен басталады.