Елордада полицейлер 29 мыңнан астам құқық бұзушылықты анықтады, - деп хабарлайды kazlenta.kz тілшісі Polisia.kz сайтына сілтеме жасап.
Астана – тазалық пен тәртіптің үлгісі. Осы мақсатта елордада "Таза Қазақстан" экологиялық акциясы өтіп, Астана қалалық полиция департаменті қоршаған ортаны абаттандыру ережелерінің сақталуын қатаң бақылауға алды.
Акция басталғаннан бері полицейлер абаттандыру талаптарын бұзу мен қоғамдық орындарды ластаудың 29 мыңнан астам дерегін анықтады. Барлық құқық бұзушыларға әкімшілік жаза қолданылды. Бұдан бөлек рұқсатсыз қоқыс шығарғаны және ағынды суларды төккені үшін 400-ден астам жүргізуші жауапқа тартылды.
Мәселен, қаладағы құрылыс компанияларының бірі тұрғын үй аумағында құрылыс қалдықтарын бейберекет жинаған. Бұл жағдай ҚР Әкімшілік құқық бұзушылық туралы кодексінің 505-бабына сәйкес әкімшілік жаза қолдануға негіз болды.
Астана қалалық полиция департаменті тұрғындарды қоршаған ортаға жауапкершілікпен қарауға, қаланың көркеюіне өз үлестерін қосуға шақырады. Егер белгісіз орындарға қоқыс тастау, құрылыс және басқа да қалдықтарды заңсыз сақтау фактілерін байқасаңыз, дереу "102" арнасына хабар беріңіз. Сонымен қатар мүмкіндігінше құқық бұзушылықты, көлік нөмірлерін фото немесе видеоға түсіріп, дәлел ретінде ұсынуларыңызға болады.