Жетісу облысында полицейлер синтетикалық есірткіні сақтау және тарату фактісінің жолын кесіп, күдіктіні ұстады, — деп хабарлайды kazlenta.kz тілшісі Polisia.kz сайтына сілтеме жасап.
“102” арнасына көпқабатты тұрғын үйдің соңғы қабатындағы подъезде қыз тұрғаны туралы хабарлама түскен. Оқиға орнына дереу патрульдік полиция ротасының қызметкерлері мен жедел-тергеу тобы барған. Тексеру барысында 20 жастағы бойжеткеннің мінез-құлқынан өзгешелік байқалған. Полицейлер ықтимал қайғылы жағдайдың алдын алу үшін қажетті шараларды қабылдады. Шақырту бойынша жұмыс жүргізу кезінде көпқабатты үйдің подъезінен изолентамен оралған 31 түйіншек табылып, тәркіленді. Сонымен қатар жалдамалы пәтерге жүргізілген тінту барысында екі аэрозольді баллон алынған.
Тергеу мәліметінше, күдікті осы жылдың сәуір айынан бастап Telegram мессенджері арқылы синтетикалық есірткілерді таратумен айналысқан. Сараптама қорытындысына сәйкес, тәркіленген заттар “скорость” деп аталатын синтетикалық есірткі екені анықталды. Тәркіленген заттың жалпы салмағы 14 грамнан асқан. Аталған дерек бойынша сотқа дейінгі тергеу амалдары жүргізілуде. Күдікті уақытша ұстау изоляторына қамалды. Қолданыстағы заңнамаға сәйкес оған мүлкін тәркілей отырып, бес жылдан сегіз жылға дейін бас бостандығынан айыру жазасы қарастырылған.