Жетісу облысы құрылғаннан бері өңірде мал шаруашылығы саласында тұрақты өсім байқалады. Соңғы 4 жылда ет өндірісі 11,6%-ға, сүт өндірісі 5,8%-ға, жұмыртқа өндірісі 7,7%-ға артқан. Бүгінде салада 3 мыңнан астам шаруашылық жұмыс істейді, олардың мыңға жуығы асыл тұқымды мал өсірумен айналысады, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Облыстық ауыл шаруашылығы басқармасының мәліметінше, өңірдегі жалпы мал басы 2,6 млн-ға жуықтаған. Оның ішінде 541 мыңы — ірі қара мал, 1,7 млн-ы — ұсақ мал, 228 мыңнан астамы — жылқы.
Биыл мал басын 9,3%-ға ұлғайтып, 121 мың тонна ет, 232 мың тонна сүт және 350 млн дана жұмыртқа өндіру жоспарланып отыр. 2026 жылдың басынан бері қуаттылығы 29,3 мың басқа арналған 72 бордақылау алаңында 19,7 мың бас ірі қара бордақыланып, тірі салмақта 23,4 мың тонна ет өндірілді.
Асыл тұқымды мал шаруашылығын дамытудың табысты үлгілерінің бірі — «Куралай» шаруа қожалығы.
Отбасылық кәсіптің негізін шаруашылық иесінің әкесі 1996 жылы қалаған. Сол кезде шаруашылықта небәрі 150 қой болған. Қазіргі таңда мал басы 2700-ге жетті.
Шаруашылық мемлекеттік қолдау шараларын белсенді пайдаланып келеді.
Бүгінде шаруашылықта ақбас қойлар мен қазақтың қылшық жүнді құйрықты қой тұқымының бес отары өсіріледі. Екі бордақылау алаңы жұмыс істейді, өнімдері Алматы қаласына жөнелтіледі.
Сонымен қатар «Куралай» шаруашылығында 100-ге жуық ірі қара мал бар. Шаруашылықтың жалпы жер қоры шамамен 7 мың гектарды құрайды. Оның ішінде суармалы, тәлімі және жайылымдық жерлер бар. Жыл сайын шамамен 500 гектар алқапта мал азығы дайындалады.
«NatAgro» ЖШС ет бағытындағы ірі қара малды селекциялау және бордақылауға маманданған. Бүгінде мұнда австралиялық технология бойынша қазақтың ақбас, әулиекөл, симментал және ангус тұқымдарына жататын шамамен 400 бас мал өсірілуде.
Фермерлердің айтуынша, саланың дамуына мемлекеттік қолдау айтарлықтай серпін беріп отыр. Соның нәтижесінде аудандағы селекциялық жұмыстардың деңгейі 27–30%-ға жеткен.