Шымкентте мал шаруашылығын қолдау мақсатында мемлекеттен қыруар қаржы бөлінген. Қазір асыл тұқымды мал басын көбейту мақсатында субсидия бөлу жайы қарастырылған.
Қала аумағындағы ауыл шаруашылығы өнімдерінің көлемін арттыру үшін құс фермалары мен етті-сүтті бағыттағы өндіріс ошақтарының саны артқан. Бұл туралы Ақпараттық коммуникациялық орталықта өткен баспасөз конференцияда Шымкент қалалық ауыл шаруашылығы және ветеринария басқармасының басшысы Абунасыр Жанбатыров айтты.
Қала аумағындағы ауыл шаруашылығы өнімдерінің көлемін арттыру үшін арнайы жиындар өткізілген. Мал шаруашылығын мемлекеттік қолдау мақсатында 1 миллиард теңгеден астам қаржы қаралды. Оның ішінде 209 миллионы жем-шөпке деп бөлініп отыр. Мемлекеттік қолдауларды тиімді пайдалану нәтижесінде 2023 жылы қала аумағына Еуропа елдерінен «ЖК Эгамназаров» шаруашылығына 104 бас мал жеткізілді. «Бәйтерек» шаруа қожалығы 34 бас асыл тұқымды сүтті-етті бағыттағы ірі қараны баптап, қаланы ет, сүт өнімдерімен қамтамасыз етуге үлес қосып отыр. Сонымен қатар, тауарлы жұмыртқа бағытындағы жұмыстарды жандандыру үшін төрт бірдей құс фермасына 413 000 бас тәуліктік балапан сатып алынды. Жүйелі жұмыстың нәтежиесінде қалада мал шаруашылығы өнімі артқан. Соңғы 10 айда 8 жарым мың тонна мал мен құс еті сойылған. Сүттің көлемі 15 пайызға артып, 51 мың тоннаға жеткен. 141 миллион дана жұмыртқа сатылып, жалпы өнім көлемі 44 миллиард теңгені құраған.