Қазақстан құрамасы бразилиялық Фос-ду-Игуасу қаласында өткен бокстан Әлем кубогының алғашқы кезеңінде сәтті өнер көрсетіп, 7 медаль (3 алтын, 1 күміс және 3 қола) жеңіп алды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жалпы нәтижеге алматылық спортшылар қомақты үлес қосып, екі алтын және бір қола медаль еншіледі. Турнир қаһармандарының бірі алматылық Виктория Графеева 60 келіге дейінгі салмақ дәрежесінде ол барлық қарсыласын айқын басымдықпен жеңіп, финалда Бразилияның қазіргі әлем чемпионын тізе бүктірді. Ол жекпе-жекте жоғары қарқын мен тактикалық басымдық көрсетті. Тағы бір алтын жүлдені Қазақстан құрамасына Сұлтанбек Айбарұлы (85 кг) салды.
Финалдық кездесуде ол бразилиялық Кауэ Белиниді 4:1 есебімен жеңіп, жекпе-жек барысын толық бақылауда ұстады. Қола медальді Алуа Балқыбекова (51 кг) иеленді. Ол жартылай финалда Қытай өкіліне 2:3 есебімен тартысты кездесуде есе жіберді.Әлем кубогының келесі кезеңі маусым айында Қытайда өтеді, ал финалдық бәсекелер Ташкентте ұйымдастырылады.