Елордалық садақшылар Әлем кубогінде үш бірдей жүлде жеңіп алды, деп хабарлайды kazlenta.kz тілшісі қала әкімдігінің ресми сайтына сілтеме жасап.
Оңтүстік Кореяның Ульсан қаласында дәстүрлі садақ атудан Әлем кубогі өз мәресіне жетті. Байрақты бәсекеге 32 мемлекеттен 535 спортшы қатысып, жекелей және командалық сайыстарда бақ сынады. Қазақстан құрамасынан 35 спортшы аттанды, олардың қатарында Астана қаласының садақшылары да бар.
Жарыстың алғашқы күнінде Қазақстан құрамасы командалық сында алтын медаль жеңіп алды. 90 метрлік мажар нысанасы бойынша өткен сайыста отандастарымыз Аустралия командасымен тең түсіп, қайта атыс нәтижесінде басым түсті. Команда құрамында елордалық спортшы Ербол Тапенов өнер көрсетті.
Ал жарыстың екінші күнінде елордалық Фариза Сабыржан жамбы нысанасы бойынша күміс жүлдеге қол жеткізсе, тағы бір спортшымыз Айкөркем Батихан жекелей сында қола медаль иегері атанды.
Осылайша, елордалық садақшылар Әлем кубогында бір алтын, бір күміс және бір қола медаль жеңіп, Қазақстан құрамасының қоржынына зор үлес қосты.