Түркияның Ялова қаласында пара үстел теннисінен ITTF World Para Future Santiago халықаралық турнирі өтті. Дүбірлі додаға әлемнің 22 елінен 125 спортшы қатысып, өзара мықтыны анықтады, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Аталған жарыста Астана қаласының намысын үш спортшы қорғады. Атап айтқанда, 4-класс бойынша Александра Степанова, 7-класс бойынша Гүлмира Қайдасова және 8-класс бойынша Балзия Таш ел абыройын асқақтатты.
Жарыс қорытындысы бойынша елордалық спортшылар жоғары нәтижеге қол жеткізді. Балзия Таш жекелей сында күміс жүлдеге ие болса, Гүлмира Қайдасова ресейлік серіктесімен бірге аралас жұптық сында (XD14) қола медаль еншіледі.