Алматы әкімі Дархан Сатыбалды жол қозғалысы қауіпсіздігі және көше жол желісін жаңғырту мәселелері бойынша кеңес өткізді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Әл-Фараби даңғылында жақында болған қайғылы жол апатына байланысты қала әкімі қаза тапқандардың жақындарына көңіл айтып, жолдағы тәртіпке бақылау айтарлықтай күшейетінін атап өтті. Осыған орай полицияға барлық құқық бұзушылық бойынша, оның ішінде көлікті тұраққа дұрыс қоймауға дейін қатаң шаралар қабылдау тапсырылды. Сонымен қатар жүргіншілер мен жүргізушілердің қауіпсіздігін қамтамасыз ету үшін цифрлық шешімдерді енгізу және жол инфрақұрылымын жақсарту жұмыстары жалғасады.
Биыл орташа жөндеу жұмыстарымен 360 көше, оның ішінде 17 магистраль қамтылады. Қазіргі таңда жол жабынындағы ақауларды, люктер мен жаңбыр суын қабылдау құрылғыларының шөгуін жою жұмыстары жүргізіліп жатыр. Мердігер ұйымдарға жұмыстардың мерзімі мен сапасын қатаң сақтау тапсырылды.