Алматыда жылдамдықты BRT жүйесін дамыту жалғасуда, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Алматы қаласының әкімі Дархан Сатыбалды Желтоқсан көшесі мен Райымбек батыр даңғылы бойындағы BRT желісінің құрылыс учаскелерін аралап көрді. Желтоқсан көшесінде BRT жолағы жолдың шеткі бөліктерімен өтіп, Тимирязев көшесіндегі қолданыстағы желіні Райымбек батыр даңғылында салынып жатқан желімен байланыстырады. Қазіргі уақытта асфальт төсеу жұмыстары толық аяқталып, жол таңбалары сызылып, көгалдандыру жүргізілуде. Тротуарлардың 60%-ы жаңартылды. Қала әкімі негізгі жұмыстарды тамыз айының соңына дейін аяқтап, қосымша көше шамдарын орнатуды тапсырды.Райымбек батыр даңғылы бойында үздіксіз жүретін арнайы жолағы бар BRT желісі салынып, жаңа аялдамалар орнатылады. Сондай-ақ, абаттандыру жұмыстары «қасбеттен қасбетке дейін» қағидасы бойынша жүзеге асады. BRT желісін кеңейту — қаланың көлік жүйесін дамытуға арналған мастер-жоспардың маңызды бөлігі. Жоба іске қосылған соң, қоғамдық көліктің орташа жылдамдығы 50–70%-ға артады деп күтілуде. Мердігер ұйымдарға жұмыс сапасын, қауіпсіздікті қамтамасыз етіп, құрылыс барысы жайлы тұрғындарды уақтылы хабардар етіп отыру тапсырылды, - делінген баспасөз қызметінің хабарламасында.