Семей қаласының 37 жастағы тұрғыны кәмелетке толмаған балаларына алимент төлеуден жалтарғаны үшін қылмыстық жауапкершілікке тартылды, – деп хабарлайды kazlenta.kz тілшісі Polisia.kz сайтына сілтеме жасап.
Бұған дейін әйел алкогольдік ішімдіктерді шамадан тыс пайдаланғанына байланысты ата-ана құқығынан айырылған. Оның 15, 13 және 9 жастағы үш баласы мемлекет қамқорлығына берілген. Сот шешімімен анадан балалар тәрбиеленіп жатқан мекеменің пайдасына олардың жеке шоттарына аудару арқылы алимент өндіріп алу белгіленген. Алайда екі жыл бойы әйел өз міндеттерін орындаудан жалтарып келген. Нәтижесінде берешек сомасы төрт миллион теңгеден асып кеткен. Сот оны кінәлі деп танып, бір жыл мерзімге бас бостандығын шектеу жазасын тағайындады. Сотталған әйел Семей қаласы Әуезов ауданының пробация қызметінің есебіне алынды. Есепке қою кезінде оған жазаны өтеу тәртібі мен шарттары, сондай-ақ оларды бұзудың салдары түсіндірілді.– Ата-ана құқығынан айырылған кезде мен болған жағдайдың қаншалықты маңызды екенін түсінбедім. Бұл уақытша ғана деп ойладым, бір жыл өтеді де, балаларымды қайтарамын, бәрін жаңадан бастаймын деп сендім. Бірақ балаларым үшін күресудің орнына, бұрынғы өмір салтымды жалғастырып, алкогольге әуестеніп кеттім, жұмысқа орналасуды кейінге қалдыра бердім. Уақыт өте келе балаларыммен байланыс үзілді. Қазір олар есейді, менімен сөйлескісі келмейді. Бұл – менің өмірімдегі ең үлкен қасірет, өз қателігімнің салдарынан ең қымбат дүниемнен – балаларымнан, олардың сенімі мен махаббатынан айырылдым. Қазір менде отбасы да, қолдау да, бұрынғы еркіндік те жоқ. Соған қарамастан, мен берілмеймін. Кеш болса да, өмірімді өзгертіп, дұрыс жолға түсіп, балаларымның сенімі мен махаббатын қайтару үшін бар күшімді саламын, – деді сотталған әйел.
Қазіргі уақытта сотталған әйелмен жұмыс жалғасуда. Пробация қызметінің қызметкерлері оған жұмысқа орналасу және әлеуметтік оңалту бағытында қажетті қолдау көрсетуде.