14 наурыз күні «Наурызнама» онкүндігінің алғашқы күні – Көрісу күні аталып өтті. Осыған орай елордалық №13 мектептің оқушылары Сарайшық ауданында тұратын қарттарды мерекемен құттықтады, деп хабарлайды kazlenta.kz тілшісі Астана қаласының әкімдігіне сілтеме жасап.
Наурызнама онкүндігінің алғашқы күні – Көрісу күні терең мағыналы дәстүр. Қыс мезгілінен кейін туыстар, достар мен көршілер бір-бірімен көрісіп, амандық сұрасып, игі тілектерін жеткізеді. Жасы кішілер үлкендерге арнайы барып сәлем берсе, ақсақалдар жастарға ақ батасын береді.
Сарайшық ауданының тұрғындары үшін бұл күн ұрпақтар сабақтастығының символына айналды. №13 мектептің оқушылары ауданның құрметті тұрғындарын арнайы барып құттықтады.
5-сынып оқушылары сынып жетекшілерімен бірге еңбек ардагерлері, тыл еңбеккерлері және білім саласының ардагерлеріне арнайы барды.«Бұл кездесу менің оқушыларым үшін өмірлік маңызды сабақ болды. Сыныпта патриотизм туралы көп айтамыз. Бірақ ардагерлермен қол алысып, олардың ақ тілектерін естігенде ғана балалар «құрмет» сөзінің шынайы мәнін түсінеді. Оқушылар кездесуге үлкен дайындықпен келіп, амандасу мен құттықтау сөздерін дұрыс айтуға ерекше мән берді», – деді 5 «Ә» сыныбының жетекшісі Гүлзада Әбілова.
«Отанға және өзінің тарихына деген сүйіспеншілікті тек оқулық арқылы үйрету мүмкін емес. Ол үлкендермен әңгімелесу, олардың өмір жолын тыңдау, ақ батасын алу арқылы қалыптасады. Бала қаланың дамуына еңбек сіңірген адамды көргенде, дәстүр оның ішкі дүниесінің бір бөлшегіне айналады», – деді білім ордасының басшысы.
«Өзім бұрын балабақшада жұмыс істегенмін, балаларды қатты жақсы көремін. Бүгін оқушылардың бізге көрсеткен құрметі – үлкен қуаныш. Осындай дәстүрлердің қайта жаңғырып жатқанына өте қуаныштымын, осы арқылы адамдар бір-біріне жақындай түседі», – деді ол.