Президенттің азаматтарды қолжетімді баспанамен қамтамасыз ету жөніндегі тапсырмаларын жүзеге асыру тұрғын үй-құрылыс жинақтау жүйесіне халықтың әл-ауқатын арттырудың негізгі құралы болуға мүмкіндік берді. «Отбасы банкі» басқармасының төрағасы Ләззат Ибрагимова Үкіметте азаматтардың нақты табысын арттыру жөніндегі міндеттердің орындалу қорытындылары туралы мәлімдеді, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Оның айтуынша, тұрғын үй сатып алу мүмкіндіктерін теңестіру үшін мемлекет жыл сайын салымшыларды қолдауға қомақты қаражат бөледі. Бұл банкке жыл сайын жеңілдікпен қарыз беруді қамтамасыз етуге жол ашады. Бүгінде «Наурыз» бағдарламасы бойынша тұрғын үй қорын жаңарту бағытына сәйкес жылдық 9%-бен 10 мыңға жуық несие берілді, бұл 2025 жылдың қорытындысы бойынша құрылыстың рекордтық қарқынымен (20,5 млн шаршы метр) көрініс тапты.Елімізде тұрғын үй-құрылыс жинақ жүйесі 23 жылдан бері жұмыс істеп келеді, осы уақыт бойы ол ЖІӨ өсіміне елеулі үлес қосуда. Біз қазақстандықтардың баспанаға жұмсайтын шығындарын азайтуға көмектесіп келеміз: біздің бағдарламалар бойынша төлем нарықтық ипотекадан 30-40%-ға төмен. Жүйе мемлекеттің қолдауымен жылдық 2%-бен жинақтауға мүмкіндік береді. Биыл 2,5 млн-нан астам отандастарымыздың шоттарына 125 млрд теңге сыйлықақы аударылды. Бұл жыл сайын жеңілдікпен 1,5 трлн теңге заем беруге мүмкіндік береді. Халықтың нақты табысының өсуі үшін пайыздық мөлшерлемені және ипотека бойынша ай сайынғы төлемді төмендету арқылы тікелей қолдау көрсету өте маңызды, — деп атап өтті Ләззат Ибрагимова.