Алматы әкімі Дархан Сатыбалды Инвестициялық штабтың отырысын өткізіп, онда жалпы құны 162 млрд теңге болатын 8 инвестициялық жоба қаралды. Атап айтқанда, Индустриялық аймақта жаңа өндіріс орындарын іске қосу, «А» санатындағы қойма кешенін салу, сондай-ақ қонақ үй инфрақұрылымы мен туризм саласын дамыту жоспарланып отыр, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жобалардың бірі — табиғи гранит әсері бар бетон бұйымдарын өндіретін зауыт салу. Мұнда фрезерлеу және жылтырату технологиясын енгізу, сондай-ақ шикізатты толық жергіліктендіру жоспарланған. Қаланың қоғамдық кеңістіктерін көркейту мен жаңарту жұмыстарын ескерсек, мұндай өнімге сұраныс жоғары болмақ.
Сонымен қатар түрлі өлшем мен жабындағы шыны пакеттерін өндіретін кешен іске қосу көзделген. 77 тұрақты жұмыс орны ашаты жобаның инвестиция көлемі 14,9 млрд теңге. Ал іске асыру мерзімі — 2 жыл.