Түркістан облысында полицейлер дрон арқылы жол ережесін бұзғандарды анықтап жатыр, – деп хабарлайды kazlenta.kz тілшісі Polisia.kz сайтына сілтеме жасап.
Түркістан облысында полиция қызметкерлері жол-көлік оқиғаларының алдын алу, жол қозғалысы ережелерін сақтау мәдениетін арттыру және азаматтардың қауіпсіздігін қамтамасыз ету мақсатында профилактикалық рейдтік іс-шараларды тұрақты түрде өткізіп келеді. Осы тұста Сайрам ауданы полиция басқармасының қызметкерлері заманауи техникалық құрал – дронды пайдаланып, бірқатар құқық бұзушылықты анықтады.
Атап айтқанда, жарық шамдарын жақпай көлік басқару және қауіпсіздік белдігін тақпау бойынша 5 дерек тіркеліп, заң талаптарына сәйкес тиісті шаралар қабылданды. Сонымен қатар, Манкент ауылында автокөлік жүргізушісі жолда, қарсы бағытқа шығып, басып озу қағидаларын бұзғаны анықталды. Аталған дерек бойынша әкімшілік шара көріліп, көлік айыптұраққа қойылды. Жинақталған материалдар заңды шешім қабылдау үшін сотқа жолданды. Полиция қызметкерлері барлық жол қозғалысына қатысушыны заң талаптарын қатаң сақтауға шақырады.