Түркістан облысында жол ережесін өрескел бұзғандар жауапқа тартылды, – деп хабарлайды kazlenta.kz тілшісі Polisia.kz сайтына сілтеме жасап.
Түркістан облысы аумағында жол-көлік оқиғаларының алдын алу және азайту, жол қозғалысы қауіпсіздігін қамтамасыз ету, жүргізушілердің тәртібін арттыру және жолда қауіпсіз мінез-құлық мәдениетін қалыптастыру мақсатында "Қауіпсіз жол" республикалық жедел-профилактикалық іс-шарасы өткізілді. Рейдтік іс-шаралар қорытындысы бойынша полицейлер жол қозғалысы саласында барлығы 4 375 құқық бұзушылықты анықтады.
Жол қозғалысы ережелерін өрескел бұзғаны үшін 291 автокөлік арнайы айыптұраққа қойылды. Атап айтқанда, 40-тан астам жүргізуші көлік құралын басқару құқығы жоқ күйде көлік басқарғаны үшін, сондай-ақ 12 жүргізуші мас күйінде көлік жүргізгені үшін жауапкершілікке тартылды. Қарсы қозғалыс жолағына шыққаны үшін 13 жүргізушіге қатысты шара қолданылды. Іс-шара аясында полицейлер жүргізушілер мен жаяу жүргіншілерге жол қозғалысы ережелерін сақтаудың маңызы және жол-көлік оқиғаларының салдары туралы түсіндіру жұмыстарын жүргізіп, жол қауіпсіздігіне қатысты профилактикалық жадынамалар мен ақпараттық парақшалар таратты. Тәртіп сақшылары азаматтарды өмірі мен денсаулығын сақтауға жауапкершілікпен қарауға, жолда қырағылық пен мұқияттылық танытуға, өзара сыйластық сақтауға және белгіленген жылдамдық режимін қатаң сақтауға шақырады. Жол қозғалысы қауіпсіздігін қамтамасыз етуге бағытталған іс-шаралар жалғасын табады.