Алматыда синтетикалық есірткі заттарын заңсыз сақтады және таратты деген күдікпен жас жігіт ұсталды, – деп хабарлайды kazlenta.kz тілшісі Polisia.kz сайтына сілтеме жасап.
Ұстау шарасы есірткі қылмысына қарсы іс-қимыл басқармасы қызметкерлерінің Әуезов аудандық полиция басқармасымен бірлесіп жүргізген жедел-іздестіру іс-шаралары барысында жүзеге асырылды. Полиция қызметкерлерін көрген сәтте күдікті тыйым салынған заттардан құтылуға әрекеттенген, алайда дер кезінде ұсталды.
Тексеру және процессуалдық әрекеттер барысында одан ерекше иісі бар ұнтақ тәрізді зат салынған орамалар тәркіленді. Сот-сараптама қорытындысына сәйкес, аталған зат синтетикалық есірткі – мефедрон екені анықталды. Аталған дерек бойынша қылмыстық іс қозғалды. Қылмыстың барлық мән-жайын, сондай-ақ ықтимал сыбайластар мен есірткі тарату арналарының жолын анықтауға бағытталған тергеу амалдары жүргізілуде. Алматы қаласы ПД есірткі қылмысына қарсы іс-қимыл басқармасының бастығы Мұрат Жұмабаевтың айтуынша, мұндай фактілер полицияның ерекше бақылауында.