ҚР ауыл шаруашылығы министрі Айдарбек Сапаров Үкімет отырысында ауыл шаруашылығы өнімдерін өңдеуді кеңейту және тереңдету бойынша қабылданып жатқан шаралар туралы баяндады, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Ол қазіргі уақытта ауыл шаруашылығы өнімдерін қайта өңдеу саласы тұрақты және серпінді дамып келе жатқанын атап өтті. 2025 жылдың қорытындысы бойынша азық-түлік өндірісінің көлемі 3,9 трлн теңгені құрады, бұл 2024 жылғы деңгейден 8,1%-ға жоғары; негізгі капиталға салынған инвестициялар 2 есе өсіп, 389,4 млрд теңгеге жетті; 2025 жылғы 11 айда өңделген өнімнің экспорты $3,2 млрд болды, бұл өткен жылдың сәйкес кезеңінен 33,8%-ға артық.Бұдан басқа, АӨК экспортының жалпы көлеміндегі өңделген өнімнің үлесі 52%-ды құрайды. Мұның бәрі өндірісті әртараптандыруға және қосылған құны жоғары өнім үлесін арттыруға бағытталған жүйелі жұмыстың нәтижесі, — деді Айдарбек Сапаров.