Астанада қар күреу жұмысы күндіз де, түнде де жүргізілуде. Қаланың коммуналдық қызметтері тәулік бойы жұмыс істеп жатыр, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Өткен түнде қар полигондарына 2 610 ауыр жүк көлігінің рейсімен елордадан 42 мың текше метрден астам қар мен мұз шығарылды.
16 ақпан күні таңертеңнен бастап қалада осы жұмысқа шамамен 1 700 арнайы техника мен 3 036 жол жұмысшысы жұмылдырылды.
Ең алдымен негізгі көшелер мен қоғамдық көлік жүретін бағыттар тазартылады. Одан кейін қозғалыс қарқыны орташа аумақтарда – аулаларда, алаңдарда, тротуарлар мен аялдамаларда тазалау жұмысы жүргізіледі.
Жалпы, қыс мезгілі басталғалы бері қаладан қар полигондарына 347 124 рейспен 5 млн текше метрден аса қар шығарылған. Қала тұрғындарының қауіпсіз қозғалысын қамтамасыз ету үшін жолдар, тротуарлар мен көшелерге техникалық тұз себілуде. Бұл жұмыстар да тәулік бойы атқарылып жатыр. Астана қаласының әкімдігі қала тұрғындары мен қонақтарын қауіпсіздік ережелерін сақтауға, жолдар мен тротуарларда барынша сақ болуға, сондай-ақ қолайсыз ауа райы жағдайында алыс жолға шықпауға шақырады.