Алматыда техникалық және кәсіптік білім беру жүйесінде дуалды оқыту мен халықаралық ынтымақтастық дамып келеді. Бүгінде өндірістік тәжірибемен ұштасқан дуалды жүйе бойынша 22 мыңнан астам студент білім алып жүр, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Бұл – грант негізінде білім алушылардың 43,7 пайызын құрайды. Аталған модельді жүзеге асыру мақсатында 71 мамандық бойынша 770 кәсіпорынмен келісімшарттар жасалды. 2025 жылдың қорытындысы бойынша колледж түлектерінің жұмысқа орналасу деңгейі 94,3%, 17 мыңнан астам жас тұрақты жұмыспен қамтылды. Сонымен қатар алты колледждің 110 студенті Қытайда тағылымдамадан өтті, ал 16 студент Германия кәсіпорындарында ақылы өндірістік практикаға қатысты.
Мемлекеттік колледждерде WorldSkills стандарты бойынша демонстрациялық емтихандар енгізіліп отыр. 2025 жылы оны 3 620 түлек тапсырды, оның 3 521-і Skills Passport алды. Алматыда 18 құзырет орталығы жұмыс істейді, ал WorldSkills жеңімпаздарына 9 млн теңге көлемінде сыйақы төленді.