Ақмола облысының Зеренді ауданында 2025 жылы жеке инвестициялар есебінен ұзындығы 2,5 шақырым болатын шаңғы-роллер трассасы қайта жаңғыртылды. Жобаның іске асырылуы биатлоншылар мен шаңғышыларды даярлау мүмкіндіктерін едәуір кеңейтіп қана қоймай, тұрғындар үшін күндізгі және кешкі уақытта жаттығу жасап, белсенді демалуға қолайлы жағдай жасады, деп хабарлайды kazlenta.kz тілшісі Ақмола облысы әкімдігінің баспасөз қызметіне сілтеме жасап.
Жұмыс сапары барысында Ақмола облысының әкімі Марат Ахметжанов нысанды аралап көрді. Өңір басшысы жас спортшылармен кездесіп, жергілікті тұрғындармен пікір алмасты, сондай-ақ жас шаңғышылармен бірге жаңартылған трассада 7,5 шақырым қашықтықты еңсеріп, шаңғы теуіп көрді.
«Өткен жылы «Қазақстан халқына» қорының қаражаты есебінен 1,5 мың шаңғы жиынтығы сатып алынды, оның ішінде Зеренді спорт мектебіне де берілді. Біз қысқы спорт түрлерін одан әрі дамытуымыз керек, бұл бағытта әлеуетіміз зор. Қысқы Олимпиада ойындарына қатысқан 36 қазақстандық спортшының алтауы – ақмолалықтар. Спортпен айналысуға ешқашан кеш емес», – деп спорт мектебінің тәрбиеленушілеріне үндеу жасады Марат Ахметжанов.
Кешкі уақытта жарықтандырылатын трасса бойында күркелермен әткеншектер орнатылған 8 демалыс аймағы абаттандырылып, жаттығулар мен серуеннен кейін демалуға арналған орындықтар қойылған. Сонымен қатар екі киім ауыстыратын бөлме, төрешілер бөлмесі және жылы санитарлық торапты қамтитын контейнерлік модульдер орнатылды. Жергілікті тұрғындардың айтуынша, кешкі мезгілде және демалыс күндері шаңғы-роллер трассасы адамға толы, себебі демалуға барлық жағдай жасалған.
Сондай-ақ Марат Ахметжанов 2025 жылдың қаңтар айында ашылған белсенді ұзақ өмір сүру орталығының белсенділерімен кездесті. Орталыққа шамамен 30 адам психология, жүзу, йога, музыка және қолөнер бағыттары бойынша сабақтарға қатысады. Сыртқы іс-шараларға қатысу үшін шағын автобус сатып алынған.