Астанада коммуналдық қызметтер тәулік бойы көшелер мен жолдарды қар мен мұздан тазарту жұмысын жүргізіп жатыр. Күн сайын жүздеген жол жұмысшылары мен арнайы техника жұмылдырылады, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Күні бойы қаладан шамамен 20 мың текше метр қар шығарылды, бұл 1582 ірі жүк көлігінің көлеміне тең. 10 желтоқсанға қараған түні қар күреу жұмысына шамамен 400 жол жұмысшысы мен 1 237 бірлік арнайы техника жұмылдырылды. Алдымен негізгі көшелер мен қоғамдық көлік жүретін жолдар тазартылады. Осыдан кейін қарқындылығы орташа учаскелерде – аулаларда, алаңдарда, тротуарларда және аялдамаларда жүргізіледі.
Қыс мезгілінің басынан бастап қаладан 352 мың текше метрден астам қар полигондарға 27 444 жүк көлігімен жеткізілді.Астана әкімдігі қала тұрғындары мен қонақтарына жолда және тротуарларда қауіпсіздік ережелерін сақтауды, абай болуды және қолайсыз ауа райында алыс сапарларға шықпауды кеңес етеді.