Алматы әкімінің орынбасары Бейбіт Шаханов қаладағы ең танымал нысандардың бірі – зообақты жаңғырту жоспары туралы айтты, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Зообақ – келушілер саны тұрақты өсіп отырған бірегей нысан. Алайда ондағы вольерлер мен инфрақұрылым ескірген, жануарларды күтіп-ұстаудың қазіргі талаптарына сәйкес келмейді. Жаңғырту аясында жануарларға барынша қолайлы табиғи аймақ құру және автотұрақ аумағын кеңейту жоспарланған. Маңызды кезеңдердің бірі – іргелес жер телімдерін сатып алу. Бұл инфрақұрылымды толық жаңартуға, заманауи табиғи орта жасауға және автотұрақ орындарын көбейтуге мүмкіндік береді. Жоба бойынша жұмыс басталып кетті. Келесі жылы жобалық-сметалық құжаттаманы әзірлеуді аяқтау жоспарланып отыр. Жер телімдері сатып алынғаннан кейін зообақ ауқымды түрде жаңғыртылады, - делінген хабарламада.
