Астанада Білім басқармасының ұйымдастыруымен «QAZAQSTAN» орталық концерт залында Ұстаздар күніне арналған «Ұстаз – ұлттың шамшырағы» атты салтанатты мерекелік концерт өтті, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Іс-шараға елорданың 3000-ға жуық педагогі және еліміздің барлық өңірінен үлгілі ұстаздар келіп қатысты. Сонымен қатар мерекелік кешке Оқу-ағарту министрі Жұлдыз Сүлейменова, Астана қаласы әкімінің орынбасары Есет Байкен, білім саласының ардагерлері мен мамандары құрметті қонақ ретінде шақырылды. Салтанатты кеш аясында министр өмірлік маңызды миссия арқалаған барша ұстаздарды мерекемен құттықтап, саланы дамытуға зор үлес қосқан педагогтерді «Ерен еңбегі үшін», «Шапағат» және «ҚР Еңбек сіңірген ұстазы» медальдерімен марапаттады. Кеш барысында бала бойына білім мен тәрбиенің дәнін егетін ұстаздар қауымына ерекше құрмет көрсетілді.
Ол елорданың білім беру саласына сүбелі үлес қосып жүрген бірқатар педагогтер мен үздік білім ордаларына арнайы марапаттар табыстады.Атап айтқанда, «Құрметті педагог» марапаты Ж. Аймауытов атындағы №24 орта мектебінің қазақ тілі мен әдебиеті пәнінің мұғалімі Дана Жаңабекке, №9 «Зерде» мамандандырылған лицейі география пәнінің мұғалімі Гүлшат Ермағанбетоваға, №2 арнайы мектебі еңбек пәнінің мұғалімі Зумрет Самратоваға берілді. Сонымен қатар «Үздік техникалық және кәсіптік білім беру ұйымы» арнайы сертификатына Астана қаласы әкімдігінің Жоғары көлік және коммуникация колледжі ие болды. «Үздік білім беретін орта мектеп» марапаты Райымбек батыр атындағы №50 «Қазғарыш» мектеп лицейіне табыс етілді. Мерекелік жиын соңы елімізге танымал эстрада жұлдыздарының және өнерлі ұстаздардың қатысуымен концерттік бағдарламаға ұласты.
