ҚР Премьер-министрінің бірінші орынбасары Роман Скляр «SVEVIND Group» бас директоры Вольфганг Кропппен кездесу өткізді. Маңғыстау облысында «жасыл» сутегін өндіру бойынша HYRASIA ONE ауқымды инвестициялық жобасын іске асыру мәселелері, сондай-ақ тұрақты энергетика саласындағы ынтымақтастықты кеңейту перспективалары талқыланды, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Роман Скляр Қазақстан тұрақты энергетика саласында неміс бизнесімен ынтымақтастықты нығайтуға ерекше мән беретінін және Үкімет жобаны табысты іске асыру үшін жан-жақты қолдау көрсетуді жалғастыратынын атап өтті.
Өз кезегінде, Вольфганг Кропп Маңғыстау облысында «жасыл» сутекті өндіру жөніндегі стратегиялық жобаны іске асыруға бейілділігін растады және Үкімет тарапынан көмек көрсетіліп жатқанына алғысын білдірді.
Тараптар HYRASIA ONE жобасы тұрақты энергетика саласындағы неміс бизнесімен өзара іс-қимылдың флагмандық үлгісі болып табылатынын және өнеркәсіпті, көлік пен энергетиканы декарбонизациялауды қамтамасыз ететінін атап өтті.
Кездесу барысында Инвестициялар туралы келісім бойынша қосымша келісімге қол қойылды.