Қазақстанның Еңбек және халықты әлеуметтік қорғау министрі Светлана Жақыпова Мәжіліс кулуарында блогердің аутизмі бар балаларды өлтіруге шақыруына қатысты пікір білдірді, - деп хабарлайды kazlenta.kz тілшісі Tengrinews.kz сайтына сілтеме жасап.
Блогер әлеуметтік желіде аутизмі бар балаларды не емдеу, не өлтіру керек деп жазған.
"Бұл пікірді өз басым қолдамаймын. Мұндай жағдайлар мен көзқарастарға жол берілмеуі тиіс. Біз инклюзивті қоғам құрып жатырмыз және мүгедектікке байланысты ешқандай кемсітушілікке жол бермейміз", – деді Жақыпова.
Оның айтуынша, аутизмі бар балалар бірнеше ведомствоның – Оқу-ағарту, Еңбек және Денсаулық сақтау министрліктерінің ерекше бақылауында.
"Біз бұл балаларды толық қолдап келеміз. Ал блогерге қатысты құқық қорғау органдары ең дұрыс әрі ең қатаң шешім қабылдайды деп ойлаймын", – деп қосты министр.
Айта кетейік, бұған дейін блогер Райхан Жұмамуратова әлеуметтік желідегі парақшасында даулы жазба қалдырған болатын. Осыған байланысты Алматы полициясы аутизмі бар балаларға қатысты жеккөрушілікке шақыру фактісі бойынша қылмыстық іс қозғады.