Елордада 6-7 қыркүйек аралығында Жамбыл және Ұлытау облыстарының тауар өндірушілерінің қатысуымен өңірлік ауыл шаруашылығы жәрмеңкесі өтеді, деп хабарлайды kazlenta.kz тілшісі қала әкімдігінің ресми сайтына сілтеме жасап.
Жәрмеңкеде Жамбыл және Ұлытау облыстарының шаруалары ет, балық, сүт өнімдері, сондай-ақ көкөніс пен жеміс-жидектің кең таңдауын ұсынады. Өнімдердің фермерлерден тікелей жеткізілуі азық-түліктің қолжетімділігін арттырып қана қоймай, отандық өндірушілерді қолдауға да ықпал етеді. Ауыл шаруашылығы тауар өндірушілері Астанаға 350 тоннадан астам өнім әкеледі. Оның ішінде 150 тонна көкөніс пен жеміс-жидек, 80 тонна ет пен ет өнімдері, 50 тонна бақша өнімдері, 30 тонна сүт өнімдері, 11 тонна балық, 6 мың дана жұмыртқа және 30 тоннадан астам басқа да азық-түлік болады.
Елорда тұрғындары мен қонақтары фермерлерден өнімді тікелей сатып алумен қатар, өңірлердің шығармашылық ұжымдары өнер көрсететін концерттік бағдарламаны тамашалай алады.Жәрмеңке сағат 9:00-ден 18:00-ге дейін жұмыс істейді.Айта кетейік, биылғы жәрмеңке «Қазанат» ипподромы автотұрағының аумағында (Қарқаралы тас жолы, 1 мекенжайы) өтеді.Сонымен қатар жәрмеңке өтіп жатқан кезеңде қала тұрғындары мен қонақтарының ыңғайлылығы үшін №18, №37 және №303 автобус бағыттары қатынайтын болады.