Алматыда Баум тоғайы экожүйені сақтай отырып абаттандырылады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Алматыда аумағы 137,7 гектар болатын Баум тоғайын абаттандыру жұмыстары басталды. Жоба BAZIS-A құрылыс компаниясы қолдауымен жүзеге асырылады. Компания оған 4,7 млрд теңге бөліп отыр. Жобаның басты мақсаты — табиғатқа зиян келтірмей, демалыс пен серуендеуге арналған инфрақұрылымды ұқыпты түрде енгізу. Жер бедері, ағаштың тамыр жүйесі мен табиғи ландшафт сол күйінде сақталады.Аумақ бірнеше аймаққа бөлінеді: бір бөлігі тыныш рекреациялық демалыс аймағына айналса, екінші бөлігі экологиялық ағартуға бағытталған инфрақұрылымы бар экоаймақ мәртебесін сақтап қалады. Алматы әкімдігі табиғатты қорғау мен жасыл қоғамдық кеңістіктерді дамытуға бағытталған бастамаларды жүзеге асыру үшін әлеуметтік жауапты бизнесті тартуды жүйелі түрде жалғастыра бермек.