Көкшетау қаласының 20 жастағы тұрғынына қатысты сот үкімі шықты. Жас жігіт есірткі тасымалымен айналысқаны үшін 7 жылға бас бостандығынан айырылды, – деп хабарлайды kazlenta.kz тілшісі Polisia.kz сайтына сілтеме жасап.
Қылмыстық оқиға 2024 жылдың қазан айында басталған. Жас жігіт интернет арқылы "жұмыс берушімен" байланысып, мобильді қосымша арқылы тапсырмалар алып отырған. Белгісіз куратор оған психотроптық заттарды сатып алып, алдын ала көрсетілген мекенжайларға жасырын түрде жеткізу керектігін түсіндірген. Бірінші тапсырмасын орындап үлгермей, күдікті полиция қызметкерлерінің қолына түсті. Жедел іздестіру шаралары барысында одан аса ірі мөлшердегі мефедрон есірткісі табылып, тәркіленді.
Сот барысында айыпталушы кінәсін толық мойындап, бұл қадамға жеңіл жолмен ақша тапқысы келгендіктен барғанын айтты. Алайда мұндай “табыс” оған 7 жылға бостандықтан айырылу жазасын алып келді. Ол жазасын орташа қауіпсіздік деңгейіндегі қылмыстық-атқару жүйесі мекемесінде өтейді. Полицейлер жастарды жеңіл табысқа алданып, өмірін құрдымға жібермеуге шақырады. Айта кетейік, биыл Ақмола облысында осындай 23 есірткі тасымалдаушы ұсталды.