Павлодарда тергеу изоляторының қызметкерлері тыйым салынған затты жеткізу әрекетінің алдын алды, — деп хабарлайды kazlenta.kz тілшісі Polisia.kz сайтына сілтеме жасап.
Қылмыстық кодекстің 345-1-бабының 3-бөлігі бойынша айыпталған азамат М.-ға арналған азық-түлік салынған жол сөмкесін тексеру барысында қызметкерлер сөмкенің астарынан телефон анықтап, тәркіледі. Аталған факті бойынша азамат Г.-ға қатысты Әкімшілік құқық бұзушылық туралы кодекстің 481-бабы бойынша әкімшілік құқық бұзушылық туралы іс қозғалып, материалдар сотқа жолданды.
— Біз тергеу изоляторына тыйым салынған заттарды жеткізу әрекеттерімен жиі кездесеміз. Мұндай жағдайлар мұқият тіркеліп, құқық қорғау органдарына хабарланады, – деп атап өтті иекеме бастығының міндетін атқарушы Кәрібай Берік.
Мекеме басшылығы тыйым салынған заттарды жеткізу немесе жеткізуге әрекет жасау заң бұзушылық болып табылатынын және әкімшілік немесе қылмыстық жауапкершілікке әкеп соғатынын ескертеді.