Алматыда пәтер ұрысы ұсталды, - деп хабарлайды kazlenta.kz тілшісі Polisia.kz сайтына сілтеме жасап.
Алматы қаласында криминалдық полиция қызметкерлері арнайы жасақпен бірлесіп, пәтер ұрлығына күдікті азаматты ұстады. Қала полициясы таратқан ақпаратқа сәйкес, күдікті күндізгі уақытта, үй иелері сыртта болған сәтте, баспаналарға еркін еніп, ұрлық жасаған. Алматы қалалық полиция департаменті криминалдық полиция басқармасының бастығы Талант Исаевтың айтуынша, қазіргі таңда оның кем дегенде бес ұрлық фактісіне қатысы бар екені анықталып отыр. Бұл қылмыстар қаланың әртүрлі аудандарында тіркелген. Жәбірленушілерге келтірілген жалпы материалдық шығын көлемі 800 мың теңгеден асады.
Полиция тұрғындарды қарапайым қауіпсіздік шараларын сақтауға шақырады: үйден шығарда есік пен терезенің жабық екеніне көз жеткізіп, сенімді құлыптар орнату және бейнебақылау жүйелерін қолдану қажет. Мұндай алдын алу шаралары азаматтардың мүлкін сақтауға сеп болады.