Қостанайда сауда орталығында жарылғыш құрылғы туралы жалған хабар таратқан жасөспірім анықталды, - деп хабарлайды kazlenta.kz тілшісі Polisia.kz сайтына сілтеме жасап.
Қостанай қаласындағы сауда орталықтарының бірінде жарылғыш зат қойылды деген ақпарат бойынша шұғыл тексеріс жүргізілді. Хабарлама жалған болып шықты. Алайда жедел-іздестіру іс-шаралары нәтижесінде құқық қорғау органдары жалған ақпарат таратқан тұлғаны анықтады. Қостанай облыстық полиция департаментінің экстремизмге қарсы іс-қимыл басқармасының қызметкерлері телефон қоңырауын жасаған адамның жеке басын анықтап, ол қала мектептерінің бірінде оқитын кәмелетке толмаған жасөспірім екенін анықтады. Жасөспірім заңды өкілінің қатысуымен бұл әрекетті бұзақылық ниетпен жасағанын мойындады. Оның айтуынша, мұндай әрекеттің салдары туралы білмеген. Оқиға орнына дереу жеткен арнайы қызмет өкілдері ғимарат пен оның аумағын мұқият тексеріп, ешқандай жарылғыш зат таппады. Соған қарамастан, мұндай әрекет ел арасында дүрбелең тудырып, төтенше қызметтердің жұмысын қиындатты.
Қазіргі уақытта балаға қатысты ата-анасының, мектеп психологы мен әлеуметтік педагогтың қатысуымен профилактикалық және тергеу шаралары жүргізіліп жатыр. Сонымен қатар баланың анасы кәмелетке толмағанды тәрбиелеу міндеттерін тиісті деңгейде орындамағаны үшін әкімшілік жауапқа тартылды. Полиция департаменті терроризм актісі туралы көрінеу жалған хабарлама – ауыр қылмыстық құқық бұзушылық екенін ескертеді. Мұндай әрекеттер, тіпті кәмелетке толмағандар тарапынан жасалса да, заң аясында қатаң жазаланады. Қоғамдық қауіпсіздікке қауіп төндіретін "әзілдердің" салдары ауыр болатынын әр азамат ұғынуы тиіс.