Германияның көлік және қаржы орталығы болып саналатын Гессен федералдық жері екі ел арасындағы сауда-экономикалық және инвестициялық қатынастарды дамытуда маңызды байланыстырушы рөл атқарады, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Мұны ҚР Премьер-министрінің бірінші орынбасары Роман Скляр бастаған қазақстандық делегацияның қатысуымен Германияның Майндағы Франкфурт қаласында өткен «Kazakhstan Investment Day 2025» ауқымды форумы да растады.
Іс-шараға ресми тұлғалар, іскерлік топтар мен сарапшылар қауымдастығының 200-ге жуық өкілі қатысты.
Форум аясында «Қазақстан – мүмкіндіктер нарығы: инвестициялар және қаржыландыру мүмкіндіктері» және «Шикізат жеткізу және жаңа нарықтарды игеру үшін логистика» тақырыптарында пікірталас өтті.
Спикерлер неміс бизнесінің Қазақстанмен іскерлік ынтымақтастықты одан әрі кеңейтуге жоғары қызығушылық танытып отырғанын және жергілікті нарыққа қатысуын арттыруға дайын екенін атап өтті.
Германияның Deutsche Bank, Commerzbank, KfW, Франкфурт қор биржасы сияқты жетекші қаржы институттары шоғырланған Гессен федералдық жері бірлескен жобаларды жүзеге асыру үшін әлеуетті серіктестер мен инвесторларды іздеуде маңызды алаң бола алады.
Франкфуртқа сапар барысында Роман Скляр Гессеннің Халықаралық ынтымақтастық, Еуропа және дебюрократизация істері жөніндегі министрі Манфред Пентцпен кездесу өткізді.
Әңгімелесу барысында М. Пентц Гессен үкіметінің таяу айларда Қазақстанға экономикалық делегация жіберу туралы қабылдаған шешімі туралы баяндады. Сапардың мақсаты – келешегі бар және өзара тиімді жобаларға инвестиция салудағы нақты қадамдарды анықтау.
Тараптар Қазақстан мен Гессен арасындағы сауда-экономикалық ынтымақтастықтың қазіргі жағдайы туралы пікір алмасып, оның әрі қарай даму перспективаларын талқылады.
Сонымен қатар Роман Скляр Қазақстан-Герман іскерлік кеңесінің тең төрағасы, Германия экономикасы шығыс комитетінің басқарушы директоры Михаэль Хармспен, сондай-ақ бірқатар неміс компанияларының өкілдерімен екіжақты кездесулер өткізді.
Анықтама: Гессен – Германиядағы экономикасы дамыған федералдық жерлердің бірі. 2024 жылы ЖІӨ көлемі 370 млрд еуроны құрады, бұл Германияның жалпы экономикалық әлеуетінің шамамен 9%-на тең. Гессен арқылы Германияның негізгі су жолы – Рейн өзені өтеді, ал Франкфурт әуежайы – Еуропадағы ең ірі әрі тығыз жұмыс істейтін әуежайлардың бірі саналады. Рейн-Майн өңірі, әсіресе Рур ауданынан кейінгі өнеркәсібі жақсы дамыған аймақ атауына ие, онда химия-фармацевтика өнеркәсібі мен автомобиль жасау саласының үлесі жоғары.