Алматыда әл-Фараби даңғылының бөлу жолағы бойына 292 жаңа шегіршін мен шаған отырғызылды, деп хабарлайды kazlenta.kz тілшісі экология басқармасына сілтеме жасап.
Ағаштардың биіктігі – кемінде алты метр. Олар жергілікті тәлімбақтарда өсірілген және мегаполистің климаттық жағдайына бейімделген. Бұл ағаш түрлері кездейсоқ таңдалмаған: шегіршін мен шаған ауаның ластануына, температураның ауытқуына төзімді әрі ауаны тиімді тазарта алады. Оларға күтім жасау үшін арнайы шаралар қарастырылған: жазда тұрақты суару және минералды тыңайтқыштар енгізу, сондай-ақ күзгі-қысқы кезеңде тиісті күтім көрсету.Көгалдандыру «Таза Қазақстан» және «Алматы – ортақ үйіміз» бағдарламалары аясында жалғасуда. Наурыз айында қала бойынша 2 000 ағаш отырғызу жоспарланған. Қазіргі таңда 600-ден астам ағаш егілді.