Қарасу шағын ауданындағы скверге биіктігі 6 метр болатын 42 ірі қарағай көшеті отырғызылды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Бұл «Таза Қазақстан» бағдарламасы мен «Алматы – біздің ортақ үйіміз» науқанының бір бөлігі ретінде қоғамдық кеңістіктерді көгалдандыруға бағытталған бастама.Ірі көшеттердің тамыр жүйесі жақсы дамыған, діңі берік, тәжі қалың, сондықтан олар тез бейімделіп, орнығып кетеді. Мұндай ағаштарды отырғызу шағын ауданның көркін келтіріп қана қоймай, жайлы жасыл аймақтар құрып, көлік шығарындыларынан ауаның ластану деңгейін төмендетуге және экологияны жақсартуға көмектеседі. Ағаштарға автоматты суару жүйесі орнатылған, ал олардың күтімімен үш жыл бойы мердігер ұйым айналысады. Тұрғындар не дейді? Гауһар Шерәлиева:«Бұрын бұл жер бос алаң болатын, жазда қураған шөп өрт қаупін тудыратын. Енді таза қылқан жапырақты ауа, ағаштардың көлеңкесі – бәрі де кеңістікті жайлы әрі тартымды етті».Наурыз айында Алматыда 2 000-ға жуық ірі ағаш отырғызу жоспарланған. Көшеттер Саин, Рысқұлов, Сәтбаев көшелерінде, Көкжиек шағын ауданында, Гүлдер саябағында және басқа да қоғамдық кеңістіктерде пайда болады.