Үлкен Алматы өзені жағалауының реконструкциясы 2026 жылы аяқталады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Алматы әкімі Ерболат Досаевтың айтуынша, Бостандық ауданында қоғамдық кеңістіктерді көркейту жұмыстары жалғасып келеді. Қазіргі уақытта Үлкен Алматы өзені жағалауы реконструкцияланып жатыр, оны 2026 жылдың сәуірінде аяқтау жоспарланған. Биыл сәуір айында Гагарин даңғылы бойындағы бульварды көгалдандыру жұмыстары аяқталады. Мамырда «Атакент» ҚІЫО аумағын, «Оңтүстік» саябағының солтүстік бөлігін және Нұр-Алатау шағын ауданындағы скверді көркейту басталады.Осы кезеңде Республика алаңындағы субұрқақтарға күрделі жөндеу жұмыстары басталады. Оларды 2025 жылдың қазан айында аяқтау жоспарланған.2024 жылы үш аймақ көріктендірілді: Абай даңғылы (Тұрғыт Өзал көшесінен Байзақов көшесіне дейін), Желтоқсан көшесі (Абай даңғылы мен Сәтбаев көшесінің аралығы), Абай мен Гагарин даңғылдарының қиылысындағы сквер. Бұл аумақтарда балалар және спорт алаңдары орнатылып, жарықтандыру жаңартылды, ағаш отырғызылды.