Астанада демалыс күндері тәртіп сақшыларымен 33 мас жүргізуші анықталды, – деп хабарлайды kazlenta.kz тілшісі Polisia.kz сайтына сілтеме жасап.
“Мас жүргізуші – қылмыскер!” жергілікті рейдтік іс-шарасы барысында патрульдік полиция қызметкерлері көлікті мас күйінде басқару, тыныштықты бұзу, агрессивті жүргізу, дрейфинг, жарыс және т.б. сияқты жол қозғалысы ережелерін бұзуды анықтады.
Демалыс күндері екі күн ішінде полицейлер түрлі дәрежедегі мас күйде болған 33 жүргізушіні ұстап, Астана қаласының наркологиялық және психотерапия орталығына медициналық тексеруден өткізу үшін жеткізген.
Осылайша, түнде патрульдік полицейлер Қорғалжын тас жолының бойында JAC J7 көлігін тоқтатқан. Құжаттарды тексеру кезінде тәртіп сақшылары көліктің ішінен алкогольдің өткір иісі шыққанын байқап, қызметкерлер медициналық тексеруден өтуге шешім қабылдаған. Сараптама қорытындысы бойынша, 35 жастағы жүргізушінің орташа дәрежеде мас болғаны анықталған.
Тергеу барысында көлік құралын басқару құқығынан айырылған жүргізуші мас күйде рөлге отырғаны белгілі болған. Өткен жылдың қазан айының басында ол сот шешімімен 7 жыл мерзімге көлік жүргізу құқығынан айырылған. Құқық бұзушыға қатысты ҚР қылмыстық кодексінің 346-бабы бойынша қылмыстық іс қозғалып, көлік коммуналдық тұраққа қойылған.