Шымкент қаласы аумағында орналасқан ірі сауда орындары маңында көлік кептелісі жиі орын алатын. Әсіресе, шаһардағы «Алаш», «Бекжан» базарлары көлік ағыны жоғары, халық көп шоғырланатын аумақ болып саналады. Сондықтан, биыл сауда орындары маңына А-2 автомобиль жолы мен Темірлан тас жолы бойында үш жер асты өткелінің құрылысы қолға алынған болатын.
Мегаполистің басшысы Ғабит Сыздықбеков «Алаш» базары маңындағы жаяу жүргіншілер өткелдерін аралап, жаңа нысандардың сапасын тексерді. Құрылысы жарты жылда жүргізілген жер асты өткелдері халық игілігіне қолданысқа берілді. Енді осы аумақтағы жаяу жүргіншілердің қатынауы жеңілдеп, көлік кептелісі азаятын болады. Темірлан тас жолы арқылы өтетін жер асты жаяу жүргіншілер өткелінің ұзындығы 42,5 метр, ені 6,1 метр, биіктігі – 2,65 метр. Жобаға сәйкес, А-2 автомобиль жолындағы өткел ұзындығы — 36,5 метр, ені 6,8 метр, биіктігі 2,6 метрді құрайды.
Қала басшысы аудан әкіміне жаңа нысандарды күтіп-ұстау жұмыстарын жүргізуді тапсырды. Ал тиісті басқарма басшысына жүріп-тұруы қиын тұрғындарға қолайлы жағдай жасау бойынша нақты тапсырма берді.Айта кетейік, қазір «Бекжан» базары маңында А-2 автомобиль жолы арқылы өтетін жер асты өткелінің құрылыс-монтаж жұмыстары да аяқталуға жақын.Өндірістік кестеге сәйкес нысан жыл соңына дейін пайдалануға беріледі.Айта кеткен жөн, қазіргі таңда қала аумағында көлік кептелісін болдырмау, азаматтардың қауіпсіздігін қамтамасыз ету шаралары мықтап қолға алынған. Жыл сайын жаңарып келе жатқан мегаполис мүмкіндіктерін осылайша оңды іске асырып отыр.